ఆక్రోశపర్వం
-----------------రావెల


ఊటలూరని బావుల్లా
ఉక్కిరి బిక్కిరౌతున్న
మానవుల మనో వల్మీకాలు

శాఖాచంక్రమణలు చేయడానికి
తావుల్లేక తల్లడిల్లుతున్న పక్షి గణాలు..

నేలకు రాలిపడినా క్షణాల్లో
ఆవిరవడం ఖాయమని
అలమటిస్తున్న వానచినుకులు

ఇంకా ఏం బావుకోవాలని
 నీ తాపత్రయం సోదరా?

తాబేటికాయల ఊసులే మరచిపోయాం
నీళ్ళ సీసాలుకొనుక్కుని కంపెనీల
జేబులు నింపుతున్నాం.. సుఖలాలసులమై
రహదారులను నిర్మించుకుంటూ నేలనంతా
సిమెంట్ పరుపుల్లా మార్చేసుకుంటూ
కాలాన్ని  దుబారాగా వెచ్చిస్తున్నాం..

చల్లదనంకోసం చెట్టునీడలను ఆశ్రయించే వీలు లేక
సమశీతోష్ణపు గదుల్లో విశ్రమిస్తున్నాం!!
ఇంకా యేం సాధించాలని ఆధునికతకోసం
అంగలారుస్తూ ఆక్రోశిస్తున్నాం?
============================