వసంత గానం
--------------------


రాలిపడిన అనేక వర్ణపత్రాలన్నీ
ధరణీ మాతకు ప్రమాణం చేస్తున్నరీతి
మనసుపొరల్లోనుంచి చెదరిపోకముందే
వసంతం శోభాయమైన హరిత జగత్తును
వెంటబెట్టుని వచ్చింది..కులాసాగా దిలాసాగా
మ్రోడు వారి ఇక మృతప్రాయమనుకున్న తరువులన్నీ
జీవలతికలను గాఢంగా కౌగిలించుకున్న అపురూప  దృశ్యం
మనోహరమై,మనోజ్ఞమై మనిషిని ఆహ్లాదపరుస్తున్నది..

దు:ఖభాజనమై నిన్నటిదాకా నిరాశాజనకమై
దిగులు మొదళ్ళతో దిగాలుపడిన ప్రకృతిమాత
నవనవోన్మేషమై నయగారాలుపోతూ
నడచివస్తున్నట్లనిపిస్తున్నది---

ప్రతి ఇంటిముందూ పచ్చని తివాసీ పరిచిన పచ్చిక బయలు
వసంత యామినికి హార్దిక స్వాగత సత్కారలందించడానికి
సమాయత్తమౌతున్నతీరు ప్రశంసార్హమై విరాజిల్లుతున్నది..

ప్రతి ఇంటికి ముందూ పచ్చిక బయళ్ళలో ఒదిగిపోయి
 శిశిరరుతువంటటా  వసివాడి తలలు వాల్చిన పూలమొక్కలు
మా నవ మన్మధుడు వచ్చాడన్న సంతోషంతో శిరసులెత్తుకుని
వీచేచిరుగాలులకు తలలూపుతూ సంగీత సమ్మేళనంలో..
గాలి వేస్తున్న ఈలపాటలకు ఘనా ఘన సుందరుని కీర్తించే
ఘంటసాలవారి గానామృతాన్నాలకించే రసజ్ఞలోకంలో
తన్మయత్వంతో తొణికిసలాడుతున్న శ్రోతలను మరపిస్తున్నాయి.
వయ్యారిభామల నృత్య ప్రదర్శనలా ఈ వసంత శోభ
మనసులను మరో మహత్తర జగత్తులోకి నడిపించే మార్గదర్శియేకదా!!
=====================================================