విర జాజి తాపం
-----------------రావెల.

కిటికీ ఊచలు పట్టుకుని
డాబామీదకెగబ్రాకే
 విరజాజి పూలతీవె
ఒడినుండా దోసిళ్ళతో
పూలను దింపి పూర్తిగా నింపేసి
ఎలానవ్వుల నయగారాలు
పోయిందో ఇంకానాకిప్పటికీ
మానసవీధిలో మధుర స్మృతిగా
గుర్తుండిపోయి తలపుకొచ్చినప్పుడల్లా
గుబాళిస్తూ పరవశింపజేస్తుంది..

ఇవ్వాళ ఆ ప్రదేశమంతా బోసిపోయి
నావైపు చూసి ఎకసక్కేలాడుతుంటే
ఎవ్వరినో ఆత్మీయులను పోగొట్టుకున్న
అనుభూతి నన్ను తనువంతా కలచివేసి
కళవళ పెట్టడం నువ్వు
గమనించే వుంటావుగదా----
ఒకప్పుడు అప్రాప్త మనోహరికోసం
అర్రులు చాచిన నా మనసే ఇప్పుడిలా
ప్రాప్తించిన పుణ్యఫలం కనులకు
దూరమై పోయిన విషయం తలుచుకుంటేనే
గుండెనంతటా  కలగుండు పడినట్లనిపి స్తున్నది..
====================================3-5-16
[పల్లె టూర్లో నులకమంచం మీద జాజి చెట్టుక్రింద
అమ్మ నాపురుడుపోసుకుందన్న తలంపును గుర్తుచేసుకుంటూ ]